Merkatoja verore po sjell zhvillime të nxehta në Premier League, por një nga lëvizjet më të bujshme të mundshme është ndalur që në nisje. Sipas raportimeve të Fabrizio Romano dhe “The Telegraph”, Newcastle United ka bllokuar çdo mundësi transferimi të sulmuesit suedez, Alexander Isak, drejt Liverpool-it.
Burimet bëjnë të ditur se klubi nga “St. James’ Park” i ka bërë të qartë yllit të tyre: “Ti nuk do të largohesh!”. Ky qëndrim i prerë vjen pavarësisht interesimit serioz të “The Reds” për të forcuar repartin ofensiv me një nga sulmuesit më të vlerësuar në Angli.
Isak, i cili ka shkëlqyer me paraqitjet e tij sezonin e kaluar, shihej nga Liverpool si një zëvendësues ideal afatgjatë në majën e sulmit. Megjithatë, Newcastle nuk ka ndërmend të humbasë një lojtar kyç në synimin e tyre për t’u rikthyer në garën për zonën Champions League.
Ky refuzim pritet të detyrojë Liverpool-in të kërkojë alternativa të tjera në treg, ndërsa Newcastle jep një mesazh të qartë se nuk do të sakrifikojë asnjë nga asetet e tij kryesore.
