Instituti Kombëtar i Shëndetësisë Publike të Kosovës (IKSHPK) ka njoftuar se nga 5 deri më 13 maj, në Kosovë janë raportuar 9 raste të fruthit.
Në njoftim bëhet e ditur se 4 raste janë nga Ferizaji, 2 raste nga Shtimja dhe nga 1 rast në komunat Lipjan, Graçanicë dhe Fushë Kosovë.
Sipas grup-moshave, rastet e raportuara janë: 7 raste të moshës 1-2 vjeç dhe 2 raste të moshës 4-5 vjeç, ndërsa të gjitha rastet kanë të bëjnë më fëmijë të pavaksinuar me vaksinën MMR (fruth, rubeollë dhe shyta).
“IKSHPK tërheq vërejtjen se nuk bëhet fjalë më vetëm për raste të “importuara”, por për raste të fruthit të shfaqura brenda komunitetit në Kosovë, drejtpërdrejt si pasojë e mosvaksinimit”, thuhet në njoftim.
IKSHPK u ka rikujtuar prindërve se fruthi është sëmundje shumë serioze, 6 herë më ngjitëse se gripi dhe se 1 në 5 persona të infektuar me fruth mund të zhvillojnë komplikime serioze shëndetësore si infeksion të veshit, pneumoni, humbje të përhershme të dëgjimit, inflamacion të trurit dhe vdekje.
Po ashtu në njoftim theksohet se më të rrezikuarit nga fruthi janë fëmijët e pavaksinuar nën moshën 5 vjeçe
Me qëllim të parandalimit të rasteve të reja dhe komplikimeve, IKSHPK u ka bërë thirrje prindërve që të kontrollojnë kartonin e vaksinimit të fëmijëve të tyre dhe t’i vaksinojnë ata sipas Kalendarit të rregullt të vaksinimit në njësitë e vaksinimit në QKMF të komunës së tyre.
“Vaksina kundër fruthit (MMR) jepet në dy doza: Doza e parë në moshën 12 muajshe, ndërsa doza e dytë në moshën 6 vjeçe. Kjo vaksinë është në përdorim prej më shumë se 60 vjetësh dhe se është e sigurt dhe efektive. Të dhënat shkencore kanë dëshmuar se 2 doza të vaksinës ofrojnë rreth 100% mbrojtja nga fruthi”, theksohet në njoftim.
Në fund, IKSHPK-ja u ka rikujtuar institucioneve parashkollore dhe atyre shkollore detyrimin për zbatimin e Qarkores Informuese për Informimin e prindërve për vaksinimin e obliguar të fëmijëve, zbatimi i së cilës do të mbikëqyret nga inspektoratet përkatëse./teve1.info/
