Komandanti i KFOR-it, gjeneralmajor Roberto Vergori, ka kryesuar ceremoninë e dorëzimit të detyrës së zëvendëskomandantit të misionit të NATO-s në Kosovë. Në këtë pozitë, gjeneralbrigade Onur Çakıcı ka zëvendësuar gjeneralbrigade Federico Collina-n.
Ceremonia është mbajtur në kampin “Film City” në Prishtinë, në selinë e KFOR-it, bëhet e ditur në njoftimin e këtij misioni.
Gjatë ceremonisë, komandanti i KFOR-it, Roberto Vergori, ka shprehur vlerësimin e tij për gjeneralbrigade Federico Collina-n, duke e falënderuar për profesionalizmin dhe lidershipin e treguar gjatë shërbimit të tij.
Njëkohësisht, Vergori i ka uruar mirëseardhje zëvendëskomandantit të ri, Onur Çakıcı, duke theksuar rëndësinë e rolit të tij në mbështetjen e misionit dhe aktiviteteve të KFOR-it.
KFOR-i ka bërë të ditur se do të vazhdojë të zbatojë mandatin e tij në bazë të Rezolutës 1244 të Këshillit të Sigurimit të Kombeve të Bashkuara.
Misioni i NATO-s në Kosovë kontribuon në mënyrë të paanshme në krijimin e një mjedisi të sigurt dhe të qetë për të gjithë qytetarët, si dhe në garantimin e lirisë së lëvizjes, në përputhje me mandatin e tij.
