Austriaku Robert Ibertsberger është njëri prej ndihmësve të selektorit të ri të Kosovës, Franco Foda. 47-vjeçari ka drejtuar Riedin e St. Poltenin në Austri, ndërsa ishte në stafet teknike të disa skuadrave të tjera. Pas dy vjetësh është kthyer në futbollin profesional dhe do ta ndihmojë Fodan te përfaqësuesja e Kosovës. Për herë të parë Ibertsberger do të punojë jashtë Austrisë.
Ibertsberger e Foda kanë të njëjtën kompani konsultimi, ndërsa kanë luajtur së bashku te Sturm Grazi. Idetë e tyre janë përshtatur dhe kështu gjermani Foda e angazhoi në shtabin teknik te Kosova.
Ndihmësi i parë i Fodas është gjermani Thomas Kristl, ndërsa i dyti është Ibertsberger.
Ibertsberger ka thënë se Kosova ka shumë lojtarë të mirë në aspektin individual.
“Çështja tani është të kemi një ide për lojtarët, të gjejmë një kombinim të duhur që gjërat të funksionojnë si ekip. Aftësitë përfundimisht janë aty”, ka thëbë Ibertsberger për “laola1.at”.
Austriaku ka folur edhe për synimet e Kosovës.
“Federata dëshiron hapin tutje, një nivel më lartë në Ligën e Kombeve dhe paraqitje me ndikim në kualifikimet për Kupën e Botës, ndoshta paraqitja në plejof. Mundësia është prezentë. Kemi lojtarë të mirë individualë. Ndoshta dikush do t’u bashkohet atyre. Ka shumë lojtarë që mund të zgjedhin mes dy vendeve. Ndoshta mund të bëjmë që të bashkohen me ne”, ka shtuar Ibertsberger.
Ai ka treguar se bëhet fjalë për lojtarë që mund të luajnë për Gjermaninë, Austrinë e Zvicrës.
“Është me rëndësi të kemi argumente të mira”, ka theksuar Ibertsberger.
Ibertsberger e di se me rezultate të mira tifozët e lojtarët në Kosovë bëhen pasionantë e emocionalë.
“Potenciali është aty. Tani është te ne trajnerët dhe te lojtarët për të kthyer entuziazmin”.
Entuziazmi rreth përfaqësueses së Kosovës ka rënë ndjeshëm pas cikleve rresht të pasuksesshme.
Kosova në mars e në qershor ka ndeshje miqësore, ndërsa në shtator nis me ndeshje në Ligën e Kombeve të UEFA-s.
Ibertsberger ka dhënë një intervistë edhe për “Salzburger Nachrichten”. Për këtë medium ka theksuar se synim i Kosovës është kualifikimi në Kupën e Botës 2026. Në tekstin për Ibertsbergerin, ky medium ka shkruar se Kosova me trajnerët e rinj synon lojtarë si Dijon Kameri e Mërgim Berisha.
