Orari dhe vendi se ku do të zhvillohet ndeshja e barazhit për Superligë, tashmë është përcaktuar.
Në këtë ndeshje të barazhit, do të përballen Vushtrria dhe Llapi, ku të dyja skuadrat synojnë fitoren për të qenë pjesë e Superligës sezonin e ardhshëm.
Kjo ndeshje do të luhet të shtunën prej orës 16:00 dhe atë në stadiumin “Fadil Vokrri” në kryeqytet, ku pritet një atmosferë e zjarrtë.
Përderisa Llapi synon mbetjen në elitë, Vushtrria kërkon rikthimin në Superligë pas disa vjetësh.
Llapi sezonin e mbylli në pozitën e tetë në Superligë, ndërsa Vushtrria doli nënkampione e Grupit B dhe në gjysmëfinale të barazhit e mposhti Lirinë e Prizrenit me rezultatin 3:1.
Për sezonin 2025/26 në Superligë, tashmë janë konfirmuar nëntë ekipe, ku në mesin e tyre janë edhe Drenica e Prishtina e Re, skuadra që dolën kampione në grupet e tyre në Ligën e Parë.
Tashmë, po pritet vetëm edhe skuadra e dhjetë, për të cilën do të vendos dueli mes Vushtrrisë dhe Llapit.
