Tyrese Haliburton dhe Indiana Pacers refuzojnë të dorëzohen — edhe në skenën më të madhe të Fibaleve të NBA-së.
Me një shënim nga distanca vetëm 0.3 sekonda nga fundi, Haliburton i dha fitoren Pacers ndaj Oklahoma City Thunder me rezultatin 111-110 në ndeshjen e parë të finales së madhe.
Ky ishte avantazhi i vetëm i Indianës gjatë gjithë takimit — por mjaftoi për të shkruar historinë.
“Basketbolli është argëtim. Fitorja është edhe më shumë,” tha Haliburton pas ndeshjes. Dhe nëse ka një mënyrë për të fituar që të bën ta ndjesh këtë, është pikërisht si sonte.
Pacers humbën plot 25 topa dhe ishin 15 pikë në disavantazh në çerekun e katërt kundër një ekipi që kishte rekordin më të mirë si vendas në të gjithë ligën. Për më tepër, nuk kishin asnjë zgjidhje për MVP-në e sezonit, Shai Gilgeous-Alexander, i cili udhëhoqi të gjithë shënuesit me 38 pikë.
Por Indiana ka njeriun e momenteve të mëdha: Tyrese Haliburton.
Jemi mësuar me ndeshje të tilla,” tha trajneri Rick Carlisle. Dhe me të drejtë — ky është rikthimi më i madh në çerekun e katërt të një finale që prej vitit 2011, kur Dallas Mavericks — gjithashtu nën drejtimin e Carlisle — përmbysën Miami Heat nga 15 pikë disavantazh.
Pascal Siakam ishte shënuesi më i mirë për Pacers me 19 pikë, ndërsa Obi Toppin shtoi 17, Myles Turner 15, dhe Haliburton e Andrew Nembhard nga 14 pikë secili.
Për Thunder, Jalen Williams shënoi 17 pikë dhe Luguentz Dort kontribuoi me 15. Kjo ishte vetëm humbja e dytë në shtëpi për Oklahoma City këtë sezon kur kishin epërsi me të paktën 15 pikë — rekord i frikshëm prej 36 fitoresh dhe vetëm 1 humbjeje deri tani.
Ndeshja e dytë do të luhet të dielën në mbrëmje sërish në Oklahoma City.
