Gjithsesi së fundi “benzinë zjarrit” i hodhi edhe trajneri Julian Nagelsmann, që bëri ironi mbi metodat stërvitore në Itali dhe deklaroi se atje futbollistët e kanë shumë të vështirë të ruajnë formën fizike gjatë gjithë sezonit.
“Kam folur me De Ligt pas stërvitjes dhe më tha se kjo ishte seanca më e vështirë për të në katër vitet e fundit. Në të vërtetë ishte një stërvitje normale e jona dhe sipas mjekut të skuadrës, nuk ishte aspak e vështirë. Kam dëgjuar se në Itali është e vështirë të ruash formën fizike, ndaj do të na duhet të punojmë shumë me De Ligt”, u shpreh Nagelsmann.
Deklarata e trajnerit të Bayernit të Mynihut hedh dyshime mbi intensitetin e stërvitjeve të skuadrave në Itali dhe në të njëjtën kohë edhe mbi aftësitë e përgatitësve atletikë atje.
Fjalët e Nagelsmann përforcojnë atë që thuhet më së shpeshti për skuadrat italiane, të cilat nuk po arrijnë të bëjnë mirë në Europë, pikërisht pasi vuajnë intensitetin me të cilin luajnë klubet e tjera.
