Vedat Muriqi shënon nga penalltia por skuadra e tij Mallorca mposhtet në finale të Kupës së Mbretit, nga Athletic Bilbao, që e fitoi trofeun e çmuar pas katër dekadave.
Në duelin final në Sevilla, baskët triumfuan pas penalltive për ta fituar Kupën e Mbretit për herë të 24-të por për herë të parë që nga viti 1984.
Ndeshja në kohën e rregullt përfundoi 1:1 (Dani Rodriguez 21’ – Oihan Sancet 50’), e në vazhdime nuk pati gola për t’u vendosur dueli përmes penalltive.
Muriqi shënoi i pari penalltinë e Mallorcas, por dy bashkëlojtarët e tij humbën dy penallti radhazi, për të pësuar 2:4 në finale.
Mallorca kërkonte trofeun e dytë të Copa del Rey në histori dhe të parin pas 21 vjetëve.
Muriqi synonte trofeun e parë me ekipin spanjoll, që kur u bë pjesë e skuadrës dy vjet më parë.
