Sulmuesi i Kombëtares së Kosovës, Vedat Muriqi është në mesin e shënuesve më të mirë të Ligës së Kombeve, garë që u themelua nga UEFA para shtatë vjetësh.
Të dielën mbrëma, u mbyll sezoni 2024/25, në të cilin triumfoi Portugalia që e mposhti Spanjën në finale.
Muriqi është në mesin e pesë futbollistëve që kanë shënuar më së shumti gola në Ligën e Kombeve, ku listës i prinë norvegjezi Erling Haaland me 19 gola.
Pas Haalandit, vijnë Cristiano Ronaldo e Aleksandar Mitroviq me nga 15 gola kurse Romelu Lukaku e Muriqi mbyllin top-5 me nga 13 gola të realizuar.
Po ashtu, Muriqi ka zënë vend edhe në listën e lojtarëve që kanë shënuar “hat-trick” në një ndeshje të Ligës së Kombeve.
Ai me “hat-trickun” e shënuar ndaj Islandës në mars të këtij viti, është lojtari më i ri në listën prej 18-të futbollistëve që kanë realizuar nga tri gola.
