Ministri i Financave dhe Transferëve, Hekuran Murati, ka thënë se aksioni i Policisë së Kosovës dhe ATK-së për mbylljen e gjashtë njësive të “Bankës Postare Kursimore” të Serbisë në veri të Kosovës, ka thënë se është bërë për të shtrirë ligjshmërinë në tërë vendin.
Ai këto komente i ka bërë, kur është pyetur për reagimin e Departamentit Amerikan të Shtetit, për këtë aksion e të cilët kanë thënë se, Qeveria nuk është koordinuar.
Murati, ka thënë se nuk i di detajet, por veprimi është bërë bazuar mbi ligjshmërinë.
“Nuk jam në dijeni për detajet, megjithatë çdo veprim është i bazuar mbi ligjshmërinë dhe shtrirjen e ligjshmërisë në çdo cep të vendit. Zyrat kanë filluar aktivitetin në vitin 2018, nuk ka të bëjë me diçka që është trashëguar nga lufta apo është shfrytëzuar ndonjë vakum për të funksionuar”, ka thënë Murati në konferencën për media pas mbledhjes së Qeverisë, raporton teve1.info.
Ai ka thënë se ka dyshime se në këto pika është ushtruar aktivitet joligjor.
Madje, ai ka thënë se duhet të kërkohet përgjegjësi se si u lejua që këto pika të hapen në vitin 2018.
Departamenti amerikan i Shtetit shprehu zhgënjimin për mbylljen nga policia e Kosovës të gjashtë njësive të “Bankës Postare Kursimore” të Serbisë në veri të vendit, duke thënë se “ky veprim nuk ishte i koordinuar me partnerët ndërkombëtarë” dhe se ai “përshkallëzon tensionet”.
“Ai (veprimi) minon perceptimin se Kosova po vepron me vullnet të mirë për zgjidhjen e çështjeve mes saj dhe Serbisë përmes Dialogut të lehtësuar nga BE-ja”, tha një zëdhënësi i Departamentit të Shtetit.
Në aksionin e së hënës Policia dhe ATK kanë mbyllur gjashtë njësi të “Bankës Postare Kursimore” në veri të vendit dhe me urdhër të prokurorit u konfiskuan 1.6 milionë euro e mbi 74 milionë dinarë.
