Ministria për Evropën dhe Punët e Jashtme e Shqipërisë ka përshëndetur paraqitjen në Kongresin e Shteteve të Bashkuara të Amerikës të projektligjit “Preshevo Valley Discrimination Assessment Bill”, i cili synon që Departamenti Amerikan i Shtetit të raportojë mbi trajtimin e pakicave etnike nga Serbia, me fokus të veçantë te shqiptarët në Luginën e Preshevës.
Sipas MPJ-së, ky projektligj përbën një njohje të rëndësishme institucionale të problematikave serioze me të cilat përballen shqiptarët në këtë rajon, veçanërisht të çështjes së pasivizimit të adresave.
Ministria vlerëson se kjo nismë shënon një hap domethënës drejt trajtimit serioz të këtyre çështjeve në nivel ndërkombëtar.
Në reagimin e saj, MPJ shpreh mirënjohje për angazhimin e Shteteve të Bashkuara të Amerikës dhe e cilëson nismën e Kongresit si një sinjal të fortë mbështetjeje për të drejtat e shqiptarëve në Luginën e Preshevës, si dhe si një kontribut të rëndësishëm për paqen dhe stabilitetin në Ballkanin Perëndimor.
“Ministria për Evropën dhe Punët e Jashtme do të vijojë të mbetet e angazhuar në ndjekjen dhe monitorimin e situatës së të drejtave të shqiptarëve në Luginën e Preshevës, si dhe në bashkëpunimin me partnerët tanë për adresimin e këtyre çështjeve”, thuhet në reagim.
