Ministria e Industrisë, Ndërmarrësisë, Tregtisë dhe Inovacionit (MINTI) ka njoftuar operatorët ekonomikë që veprojnë në prodhim, import, distribuim dhe shitje të produkteve të qumështit, se janë të obliguar të respektojnë kërkesat ligjore për informimin e saktë të konsumatorit.
Sipas MINTI-t, në përputhje me Ligjin për Mbrojtjen e Konsumatorit dhe Ligjin për Tregtinë e Brendshme, deklaracioni në paketim duhet të jetë i qartë, i lexueshëm dhe i dukshëm në gjuhët zyrtare, duke specifikuar nëse produkti është me bazë shtazore (qumësht 100%), me bazë bimore (plant-based milk) apo me bazë të qumështit pluhur.
Po ashtu, subjektet që operojnë në shitje me pakicë obligohen të bëjnë ndarjen e qartë të produkteve në rafte sipas kategorive përkatëse: produkte shtazore, produkte bimore dhe produkte me bazë qumështi pluhur.
Ministria ka bërë të ditur se përmes Inspektoratit Qendror të Mbikëqyrjes së Tregut do të intensifikohen kontrollet në ditët në vijim, me qëllim mbrojtjen e konsumatorëve dhe parandalimin e praktikave mashtruese.
Në rast të moszbatimit të ligjit, operatorët ekonomikë do të përballen me masa ndëshkuese.
Gjithashtu, qytetarët ftohen të raportojnë çdo parregullsi, përfshirë mungesën e klasifikimit të produkteve ose mungesën e deklarimit të qartë, përmes telefonit apo emailit zyrtar të MINTI-t, duke bashkëngjitur edhe dëshmi si fotografi nga raftet e shitjes.
Inspektorati Qendror i Mbikëqyrjes së Tregut ka theksuar se do të ndërmarrë masa në përputhje me legjislacionin në fuqi për çdo shkelje të konstatuar.
