Në Ministrinë e Mbrojtjes është shënuar të hënën Dita Kombëtare e Turqve të Kosovës, me ç’rast është organizuar një pritje zyrtare për ushtarakët dhe zyrtarët e Ministrisë së Mbrojtjes dhe të Forcës së Sigurisë së Kosovës (FSK) nga ky komunitet.
Me këtë rast, ministri i Mbrojtjes, Ejup Maqedonci, i shoqëruar nga zëvendësministri Enis Kervan, kanë nderuar me mirënjohje pjesëtarët e komunitetit turk që shërbejnë në FSK.
Në ceremoni morën pjesë edhe ambasadori i Republikës së Turqisë në Kosovë, Sabri Tunç Angılı, atasheu ushtarak Adem Türk, zyrtarë dhe pjesëtarë të Ministrisë së Mbrojtjes dhe FSK-së, si dhe përfaqësues të NALT-it.
Ministri Maqedonci ka vlerësuar marrëdhëniet miqësore mes Kosovës dhe Turqisë, si dhe kontributin e vazhdueshëm të shtetit turk në ngritjen e kapaciteteve ushtarake të Kosovës dhe zhvillimin institucional e shoqëror.
Ai ka theksuar se bashkëjetesa dhe harmonia mes shqiptarëve, turqve dhe komuniteteve të tjera etnike përbëjnë një aset të rëndësishëm që e forcon shoqërinë e Kosovës.
