Ka përkundur protesta e organizuar në Prishtinë në mbështetje të ish-krerëve të UÇK-së dhe kundërshtim të vendimit dënues të Gjykatës Speciale.
Në këtë protestë e cila u organizua me moton “Jo në emrin tim” morën pjesë mijëra qytetarë.
Nga protesta u tha se lufta e UÇK-së nuk mund të njolloset.
Folësit në këtë protestë kërkuan veprime nga Qeveria e Kosovës, deputetët, por patën edhe kritika për ndërkombëtarët.
Përfaqësuesi i platformës “Liria Ka Emër”, Ismail Tasholli, ka thënë se protesta e sotme në sheshin “Skënderbeu” e ka një ‘sebep’ të madh, Ushtrinë Çlirimtare të Kosovës.
Ai tha se sheshi ku po mbahet sot protesta gjithëpopullore i ka bërë bashkë qytetarët për të dërguar një mesazh të rëndësishëm, por s’janë bërë bashkë për shkak të partive, për shkak të mitingjeve të caktuara, sepse varri i dëshmorit, sipas tij, nuk ka parti politike dhe liria nuk ka parti politike.
Gazmend Syla nga Organizata e Veteranëve të UÇK-së ka thënë se Gjykata Speciale është turpi i drejtësisë ndërkombëtare.
Ai duke kujtuar dënimet që janë bërë ndaj pjesëtarëve të UÇK-së, ka thënë se miqtë ndërkombëtar kërkuan formimin e Speciales, duke thënë për t’i hequr Kosovës njollën e zezë.
Ish-nënkryetari i OVL-UÇK-së, Nasim Haradinaj, gjatë protestës së sotme në Prishtinë kundër aktgjykimit ndaj ish-krerëve të UÇK-së në Hagë, u ka bërë thirrje deputetëve të Kuvendit të Kosovës për bashkim, ndërsa ndërkombëtarëve u ka kërkuar që ta rikthejnë besimin e qytetarëve të Kosovës.
Haradinaj ka thënë se deputetët duhet të veprojnë të bashkuar dhe me përgjegjësi, ndërsa ndaj komunitetit ndërkombëtar ka shprehur kritika për mënyrën se si është trajtuar çështja e ish-krerëve të UÇK-së.
Në protestë folën edhe aktivistë të tjerë, përfaqësues të Paralamentit të Studentëve të UP-së e familjarë të dëshmorëve.
