Sot në Bruksel, Mali i Zi do të kalojë një tjetër etapë në negociatat me Bashkimin Evropian, duke mbyllur përkohësisht më shumë se gjysmën e kapitujve negociues.
Shqipëria do të mbyllë për herë të parë kapituj negociues, ndërsa Ukraina dhe Moldavia do të hapin secila nga një klaster të ri negociatash.
Komisionarja evropiane për Zgjerim, Marta Kos, tha se ky është një moment historik për Shqipërinë.
“Ky është një moment historik për Shqipërinë, e cila po nis mbylljen e kapitujve negociues. Mali i Zi, që është vendi më i avancuar në procesin e zgjerimit, do të mbyllë sot edhe dy kapituj të tjerë. Prandaj, kjo është një ditë për t’u festuar, por edhe një ditë për të shikuar përpara dhe për të punuar edhe më shumë. Ne kemi mbështetjen e shteteve anëtare, por vetëm nëse vendet kandidate përmbushin detyrimet e tyre. Pikërisht kësaj duhet t’i kushtojmë vëmendje të veçantë”, tha ajo.
Në një goditje për përpjekjet e Serbisë drejt anëtarësimit në Bashkimin Evropian, përfaqësuesit e përhershëm të vendeve anëtare të BE-së nuk arritën të mërkurën të sigurojnë unanimitetin e nevojshëm për hapjen e Klasterit 3 në negociatat e anëtarësimit të Serbisë.
Serbia mbetet e bllokuar në rrugën drejt BE-së, tetë shtete kundërshtojnë hapjen e Klasterit 3
