Në një goditje për përpjekjet e Serbisë drejt anëtarësimit në Bashkimin Evropian, përfaqësuesit e përhershëm të vendeve anëtare të BE-së nuk arritën të mërkurën të sigurojnë unanimitetin e nevojshëm për hapjen e Klasterit 3 në negociatat e anëtarësimit të Serbisë.
Sipas Euronews, që citon tre diplomatë të Bashkimit Evropian të informuar mbi takimin, tetë shtete anëtare kundërshtuan hapjen e Klasterit 3. Kundër këtij hapi u shprehën Holanda, Suedia, Finlanda, Belgjika, Estonia, Lituania, Bullgaria dhe Kroacia.
Ndërkohë, Danimarka, Luksemburgu dhe Letonia nuk e kundërshtuan hapur propozimin, por shprehën rezerva, ndërsa Franca ishte në mesin e vendeve që mbështetën avancimin e Serbisë në procesin e anëtarësimit.
Klasteri 3, i cili përfshin kapitujt që lidhen me konkurrueshmërinë dhe rritjen gjithëpërfshirëse, mund të hapet vetëm me pëlqimin unanim të të gjitha shteteve anëtare të Bashkimit Evropian.
Pak ditë para takimit, Komisioni Evropian u kishte dërguar shteteve anëtare një shënim informues (information note), në të cilin rekomandohej hapja e Klasterit 3. Sipas dokumentit, të cilin Euronews thotë se e ka siguruar, Komisioni vlerëson se Serbia ka bërë përparim në disa fusha kyçe, duke përfshirë shfuqizimin e ndryshimeve të diskutueshme në ligjet për gjyqësorin, përparimin në lirinë e mediave, reformën zgjedhore dhe bashkëpunimin me BE-në në politikën e jashtme dhe të sigurisë.
Megjithatë, në të njëjtin dokument theksohet se Serbia ende nuk është përafruar me sanksionet e Bashkimit Evropian ndaj Rusisë për shkak të luftës në Ukrainë. Komisioni vlerëson se Beogradi ka bashkëpunuar me BE-në për të luftuar shmangien e sanksioneve, ka ofruar mbështetje për Ukrainën dhe ka intensifikuar kontaktet politike me Kievin, por nënvizon se kërkohet ende punë e mëtejshme në reformën e gjyqësorit dhe sistemit prokurorial.
Sipas Euronews, një diplomat i BE-së, që foli në kushte anonimiteti, tha se kundërshtimi i tetë shteteve anëtare lidhej kryesisht me shqetësimet për sundimin e ligjit në Serbi dhe mungesën e përafrimit të plotë të vendit me politikën e jashtme të Bashkimit Evropian, veçanërisht sa i përket sanksioneve ndaj Rusisë.
Nga ana tjetër, disa shtete anëtare konsideruan se Serbia ka përmbushur, ose është në rrugën e duhur për të përmbushur, kriteret për hapjen e Klasterit 3.
Një ditë më parë, komisionerja evropiane për Zgjerimin, Marta Kos, deklaroi në Parlamentin Evropian se, në dritën e zhvillimeve të fundit pozitive, Komisioni Evropian kishte rinovuar rekomandimin për hapjen e Klasterit 3 në negociatat me Serbinë, duke theksuar se do të vazhdojë të nxisë zbatimin e reformave të mëtejshme në vend.
