Miku i madh i Kosovës, Marius Vizer, do të vazhdojë ta drejtojë Federatën Ndërkombëtare të Xhudos (IJF).
Mandatin e ri në krye të IJF-së Vizeri e siguroi të mërkurën në Kongresin në Budapest. Ai ishte kandidati i vetëm për president, ndërsa u zgjodh me votim unanim. Të gjithë delegatët kanë duartrokitur kur është përmendur emri i Vizerit, që do të jetë në krye të IJF-së të paktën deri në vitin 2029.
“Ju falënderoj përsëri për besimin, besnikërinë, bashkëpunimin dhe mbështetjen tuaj. Mund të jeni të sigurt se Komiteti i ri Ekzekutiv i IJF-së dhe unë do të jemi të përkushtuar. Do të jemi edhe më të motivuar se në të kaluarën, për të bërë gjëra gjithnjë e më të mira për të ardhmen e xhudos”, ka thënë Vizeri, që është i lindur në Rumani.
Është ky mandati i gjashtë i Vizerit si president i Federatës Ndërkombëtare të Xhudos, që tashmë është lidere sa u takon federatave të sporteve luftarake. Meritat e Vizerit për këtë vlerësohen shumë të mëdha.
Vizeri është në krye të IJF-së që nga viti 2007, ndërsa ka hapur dyert për xhudistët kosovarë që të paraqiten në garat evropiane. Po ashtu ka përkrahur rritjen e xhudos kosovare, ndërsa Kosovën e vlerëson vend mik.
Vizeri ka qëndruar disa herë për vizitë në Kosovë.
“Jam shumë krenar me xhudon e Kosovës, pasi prej paraqitjes së parë në Lojërat Olimpike ishte e suksesshme. Fillimisht Kosova fitoi një medalje të artë olimpike, më pas dy të arta olimpike e tani në Paris i fitoi edhe dy medalje të tjera. Përgëzime së pari për sportistët e po ashtu për federatën. Drejtuesit e saj kanë bërë punë të shkëlqyer. Përgëzime për Agron Kukën, kryetarin e Federatës, për Tonin, trajnerin tuaj, që ia kushtuan jetën xhudos, suksesit në sport dhe imazhit ndërkombëtar të Kosovës”, kishte thënë Marius Vizer për KOHËN në Paris, gjatë garave të xhudos në Lojërat Olimpike të vitit të kaluar.
Prej ardhjes së Vizerit në krye të IJF-së, xhudoja vlerësohet se është zhvilluar shumë. Sistemi i garave dhe i pikëzimit është i qartë, ndërsa xhudoja vlerësohet gjithnjë e më shumë në familjen olimpike dhe ngrihet vazhdimisht në renditje.
