Profesori universitar, Fadil Maloku ka thënë se opozita nuk e ka pranuar votimin e fshehtë për kryeparlamentar nga frika se mos po iu del nga kontrolli ndonjë deputet pasi në këtë mënyrë nuk do të dihej kush e si ka votuar.
Maloku vlerëson kështu pasi sipas tij ideja dhe qëllimi i opozitës ka qenë mos ta lejoj Lëvizjen Vetëvendosje ti arrij numrat që i duhet për zgjedhjen e kryetarit të Kuvendit.
“Frika e opozitës ashtu siç e kam lexuar unë ka qenë që mos po iu del jashtë kontrollit dikush nga deputetët për shkak se kur votohet dikush në mënyrë të fshehtë atëherë nuk dihet kush. Ideja dhe qëllimi ka qenë me e stopu për me arrit numrin që i nevojitet Vetëvendosjes se 57, 58, 59 mund të ndodhë për një votë të një deputeti nuk mund të konstituohet”, ka thënë ai në emisionin “Ditari” në Tëvë1.
Megjithatë, sipas Malokut edhe nëse Kuvendi do të konstituohet, një qeveri me 61 vota do të jetë jetëshkurtër dhe prandaj mendon se zgjidhja më e mirë janë zgjedhjet e ardhshme kurdo që të mbahen.
“Edhe me u konstituu, kjo qeveri me 61 vota unë mendoj që është jetëshkurtër edhe nuk do të mund t’i bëj ballë sfidave që i kemi edhe në sferën e brendshme edhe në të jashtmen. Për mendimin tim, zgjedhjet e ardhshme kurdo që të mbahen janë zgjidhja më e mirë sepse unë jam shumë i bindur që numrat do të ndryshojnë. Në favor të kujt nuk e di por ka me ndiku, tash varet prej kampeve si kanë arritur të artikulojnë me sensibilizu pjesën e elektoratit të tyre pra ta çojnë mesazhin se ne nuk jemi fajtor por janë ata, unë mendoj që e gjithë loja është këtu”, është shprehur Maloku.
