Ish- ambasadori i Shqipërisë në Kosovë, Islam Lauka ka kritikuar partitë politike për zvarritjen e procesit të formimit të institucioneve.
Ai ka thënë se pozitë dhe opozitë janë treguar të pa përgjegjshme.
Lauka në emisionin “Këndi i Debatit” në Tëvë1, ka thënë se rezultati i zgjedhjeve të 9 shkurtit ka treguar se qytetarët kanë vendosur për një qeveri të koalicionit.
“Për mua edhe Albin Kurti që është kryeministër në detyrë, Vetëvendosje që është partia më e madhe edhe opozita, në tërësi klasa politike, pozitë – opozitë është treguar e papërgjegjshme. Nuk mund t’i thuash klasë me përgjegjësi politike, asaj që krijon këtë situatë. Populli në shkurt vendosi krejtisht qartë, që duhet qeveri koalicioni”, ka thënë ai.
Ish – ambasadori i Shqipërisë, ka thënë se fajin kryesor për moskrijimin e qeverisë e ka kryeministri në detyrë, Albin Kurti, që sipas tij, si fitues i zgjedhjeve është dashur të gjejë partnerë.
Por, ai ka thënë se këtu nuk amnistohen as Abdixhiku e Krasniqi, që sipas tij kanë vendosur kushte sipas tekave të tyre.
“Nëse duhet të flasim për përgjegjësinë e ka i zoti i shpish. Përgjegjësinë kryesore për situatën aktuale e ka z. Kurti. Por kjo nuk e përjashton përgjegjësinë e opozitës”, tha ai.
Albin Kurti ka edhe 10 ditë afat për formimin e qeverisë pas mandatimit nga presidentja Vjosa Osmani.
Kurti është shprehur se do ta formojë qeverinë, por ende nuk ka treguar nëse ka nisur bisedat me ndonjë parti politike.
