Deputetja Mimoza Kusari Lila ka komentuar votimin e listës serbe para seancës për formimin e Kuvendit të Kosovës.
Ajo ka theksuar se pozita e partisë së saj politike ndaj këtij grupi mbetet e pandryshuar dhe se nuk ka besim në këtë grup politik, për shkak të kundërshtimeve të vazhdueshme që kanë paraqitur ndaj interesave të Kosovës.
“Ka ndodhur një proces i cili na ngarkon të gjithëve, por qasja jonë politike ka mbetur e pandryshuar. Nuk ka asnjë ndryshim në qëndrimin tonë ndaj këtij grupi politik, i cili deri më tani ka sjellë vetëm kundërshtime që janë në dëm të interesit të Kosovës. Interesi i Kosovës është mbi gjithçka,” tha Kusari Lila.
Ajo gjithashtu ka shtuar se është e rëndësishme që të ruhen interesat institucionale të Kosovës dhe të gjithë atyre që janë në shërbim të shtetit, duke theksuar se duhet të përfundohen proceset e rëndësishme para datës 28 dhjetor. Deputetja ka bërë thirrje për arritjen e marrëveshjeve ndërkombëtare që do të mundësojnë avancimin e mëtejshëm të proceseve politike dhe të sigurojnë stabilitetin institucional në vend.
