Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka njoftuar se ka nënshkruar inicimin e procedurës për Projektligjin për masat e përkohshme të produkteve themelore në rast të krizave ekonomike, i njohur si Ligji për çmimet tavan.
Sipas saj, ky veprim vjen pas miratimit të agjendës legjislative në Qeveria e Kosovës dhe në përputhje me zotimin e kryeministrit Albin Kurti për ta proceduar këtë nismë që në fillim të mandatit të ri.
“Ky është një hap i domosdoshëm për të mbrojtur konsumatorin dhe për të garantuar stabilitet në treg”, ka theksuar Kusari-Lila.
Ajo bëri të ditur se projektligji synon të krijojë bazën ligjore për ndërhyrje të shpejtë dhe të drejtë në raste krizash ekonomike, përfshirë rritjen e papritur të çmimeve, mungesën e produkteve themelore dhe çrregullimet në furnizim.
“Qëllimi nuk është ndërhyrja arbitrare në treg, por mbrojtja e qytetarëve nga abuzimi dhe spekulimi në kohë krize. Masat janë të përkohshme, proporcionale dhe të orientuara drejt ruajtjes së stabilitetit ekonomik”, ka shkruar ajo.
Ministrja ka shtuar se gjatë hartimit janë marrë parasysh edhe vërejtjet e mëhershme të Gjykata Kushtetuese, me synim ndërtimin e një kornize më të fortë dhe ligjërisht të qëndrueshme.
“Në një periudhë kur inflacioni ka prekur çdo familje, shteti duhet të jetë garant i balancës mes tregut të lirë dhe interesit publik”, përfundoi Kusari-Lila.
