Pas refuzimit që i bëri ftesës së homologut të tij, maqedonas Dimitar Kovaçevskit për të mos marrë pjesë në nismën e “Bllakanit të Hapur”, kryeministri Kosovës tregoi edhe njëherë pse është kundër kësaj nisme.
Në forumin e Bratisllavës “Globsec 2022”, Albin Kurti tha se Kosova nuk duhet të hapet ndaj ndërhyrjeve lindore e verilindore.
“Ballkani Perëndimor është i hapur për NATO-n, për BE-në, për Mbretërinë e Bashkuar. Nuk besoj që duhet të hapemi për ndonjë ndërhyrje verilindore ose lindore. Dhe mbështetemi shumë te procesi i Berlinit 2.0. tashmë me një nisje të freskët nga kancelari Scholz, e mbështesim iniciativën me vlerat evropiane brenda dhe BE-ja që të na ndihmojë por jo jashtë BE-së”, është shprehur Kurti.
Qëndrim të njëjtë me Kurtin ka edhe presidenti malazez, Milo Gjukanoviq, sipas të cilit Ballkani i Hapur nuk mbështetet në vlerat evropiane.
Ani pse pro kësaj nisme është deklaruar kryeministri i këtij shteti, Dritan Abazoviq.
“Mund të kemi qëndrime të ndryshme mes presidentit, qeverisë e Kuvendit, por ajo që nuk ndryshon është integrimi në Bashkimin Evropian. Por problem kryesor është se BE-ja ka shumë pak entuziazëm për integrim të Ballkanit perëndimor. Ata na akuzojnë ne, dhe janë palët e treta që fitojnë në këtë rast. Këto palë përdorin këtë hapësirë”, ka thënë Gjukanoviq.
Mungesën e entuziazmit të BE-së e pranoi edhe i dërguari për dialogun Kosovë-Serbi dhe çështjet e Ballkanit sipas të cilit kjo po sjellë shumë kritika nga rajoni.
“Ka pasë një përkushtim dukshëm më të dobët, një mungesë entuziazmi, ndoshta edhe një mungesë të pajtueshmërisë sa i përket anëtarësimit të plotë të rajonit. BE-ja po humb popullaritetin dhe kredibilitetin në rajon në masë dramatike do të thosha. Po bëhet çdo ditë e më vështirë që të jemi në këso panele në rajon e të përfaqësojmë BE-në, sepse deri më tani kemi ligjëruar në njëfarë mënyrë, por tash na kritikojnë partnerët tonë”, ka thënë Miroslav Lajçak, emisar i BE-së për dialogun Kosovë – Serbi.
Megjithatë Lajçak kërkoi mbështetjen e liderëve ballkanikë për integrimin e rajonit në Bashkimin Evropian, duke u konsideruar si hap me urgjencë.
Pjesë e këtij forumi në Bratislavë, një ditë më parë ishte edhe presidenti serb Aleksandar Vuçiq ku u diskutua për ndikimin botëror të Kremlinit dhe rrugëtimin e Serbisë drejt BE-së.
Raporti i gazetares Flaka Zogu.
