Për vite me radhë shërbeu si parking pa pagesë.
Por, nga kjo javë, parkingu më i njohur i kryeqytetit, nuk është më i tillë.
Kjo pjesë e objektit në afërsi të Qendrës Klinike Universitare të Kosovës, tashmë do të funksionojë me tarifa të përcaktuara për veturat.
Për këtë në hyrje të tij, janë vendosur edhe laurat si dhe çmimorja.
Në fazën testuese, dy orët e para të parkingut janë pa pagesë.
Ndërkohë, çdo orë pas kësaj, tarifohet me nga një euro.
E ky ndryshim, duket se është mirëpritur nga qytetarët.
“Po më duket shumë më mirë kështu se më herët vishim këtu e nuk gjenim vend. Kështu tani e gjejmë vendin e bëjmë pagesën edhe dy orët që qenë pa pagesë. E jo me e lanë veturën gjithë ditën këtu e me shkuar në vendet e tjera. Unë mendoj që kjo është në rregull”, thotë Ajet Mustafa-qytetar.
“Është normale, çdo shërbim duhet me u pagua, në rregull është çdo gjë. Nuk më ra me pagua se qëndrova vetëm dy orë dhe dy orë janë të para të lira e pastaj me pagesë”, shprehet një tjetër qytetar.
E bileta ditore e parkingut, tani kushton 7 euro e gjysmë, ajo mujore 60 euro, kurse vjetorja 600 euro.
“Nuk më erdh e befasishme se deri tani ka qenë pa pagesë, edhe prapë dy orët e para ishin pa pagesë për mendimin tim është shumë normal, kushdo me hi me pagua mas dy orëve një euro nuk është shumë. Për 24 orë duhet me pas një limit pak më ndryshe me bo një marrëveshje se besoj që kjo pastaj bëhet e papërballueshme çdo ditë me lanë”, thotë qytetarja Remzi Gashi.
E ndonëse deri më tani ky parking më së shumti u shfrytëzua nga qytetarët të cilët i marrin shërbimet mjekësore në spital, nga QKUK thonë se nuk kanë asnjë përgjegjësi për këtë objekt.
“Dëshirojmë të theksojmë se Qendra Klinike Universitare e Kosovës (QKUK) nuk ka asnjë përgjegjësi, kompetencë apo përfshirje në menaxhimin dhe operimin e parkingut në afërsi të Interex-it. Ky parking nuk është pronë dhe as parking i menaxhuar nga QKUK-ja. Rrjedhimisht,QKUK-ja nuk është autoriteti që përcakton tarifat e parkingut dhe nuk vendos për ndryshimin e çmimeve në këtë zonë. Andaj pyetjet duhet adresuar tek personat kompetent”, thuhet nga QKUK.
Të njëjtën përgjigje televizionit i kanë kthyer të enjten edhe nga Komuna e Prishtinës.
Ndërkohë, për caktimin e tarifave të parkingut dhe detaje të tjera, Tëvë1 ka pyetur edhe në këtë Qendër Tregtare, por të njëjtit nuk ishin të qasshëm gjatë ditës.



