Kryeministri i Kosovës, Albin Kurti, administratoren e USAID, Samantha Power, e ka quajtur mike të madhe të Kosovës.
Kurti ka thënë se gjatë drekës së punës është takuar me Power, ku kanë diskutuar për sigurinë energjetike, tranzicionin energjetik dhe zhvillim të qëndrueshëm.
Gjithashtu, në këtë takim është biseduar edhe për zhvillimet e fundit në vend, për qeverisjen, themelimin e Fondit Sovran, si dhe për Marrëveshjen Bazike të arritur në Bruksel.
“Nga fjalët në vepra, së bashku me të dhe me ministren Rizvanolli lansuam ankandin e parë të energjisë solare me kapacitet prej 100 megavat, duke çliruar potencialin energjetik të vendit tonë”, ka shkruar Kurti në Facebook.
Kurti ka thënë se USAID është dora e partneritetit të besueshëm në rrugën e pavarësimit nga lëndët fosile, dhe drejt energjisë së pastër.
“Të gjithë e kemi parasysh logon e USAID. Dora që na ndihmoi që të ngritemi nga rrënojat e luftës më shumë se dy dekada më parë, USAID, tani është dora e partnerit të besueshëm në rrugën e pavarësimit nga lëndët fosile, dhe drejt energjisë së pastër”, ka shkruar tutje kryeministri.
