Shefja e Grupit Parlamentar të VV-së, Mimoza Kusari-Lila, ka bërë të ditur se me kërkesë të deputetit Enis Kervan, Kryesia e Kuvendit do t’i drejtohet Qeverisë me kërkesën për të ndarë fonde dhe për t’i ofruar ndihmë njerëzore Turqisë pas tërmetit ku la të vdekur 912 persona, shkruan teve1.info
“Të prekuar nga ngjarjet tragjike të shkaktuara nga tërmetet e njëpasnjëshme në Turqi dhe Siri, nga mbledhja e sotme e Kryesisë së Kuvendit, kemi ndarë dhimbjen duke shprehur ngushellimet më të thella familjeve të viktimave, autoriteteve të vendit, dhe duke u lutur për shërimin e shpejtë të të lënduarve. Në të njejtën kohë, me iniciativën e kryetarit të grupit të miqësisë, Kosovë – Turqi, deputetit Enis KERVAN Kryesia e Kuvendit do t’i drejtohet Qeverisë me kërkesën për të ndarë fonde dhe për t’ofruar ndihmë njerëzore në mbështetje të përballjes së tragjedisë në Turqi”, ka shkruar ajo në Facebook.
Tutje Kusari – Lila ka njoftuar se Kryesia e Kuvendit është dakorduar për mbajtjen e dy seancave për këtë javë.
