Kryeministri i Marokut, Aziz Akhannouch, ka kritikuar presidentin e Federatës Mbretërore Marokene të Futbollit, Fouzi Lekjaa, pasi ky i fundit ka deklaruar se finalja e Kupës së Botës 2030 do të zhvillohet në Casablanca.
Lekjaa kishte thënë në një aktivitet të një partie politike se provinca e Benslimanes do të kishte nderin ta priste finalen e Botërorit, duke iu referuar stadiumit të ri që po ndërtohet në atë zonë.
Por FIFA ende nuk ka vendosur se ku do të zhvillohet finalja e vitit 2030.
Botërori i vitit 2030 do të organizohet nga Spanja, Portugalia dhe Maroku, ndërsa FIFA pritet të vendosë më vonë se cili prej vendeve pritëse do të organizojë ndeshjen finale.
Akhannouch ka kërkuar që Maroku të mos bëjë premtime për finalen pa u konsultuar më parë me Spanjën dhe Portugalinë.
“Mos premtoni organizimin e finales së madhe në Marok, ndërkohë që ende nuk e kemi diskutuar këtë çështje me partnerët tanë, Spanjën dhe Portugalinë. Duhet të ketë respekt, vëllezër”, ka thënë Akhannouch gjatë një tubimi politik.
Gjithashtu ai ka kritikuar përdorimin e çështjes së finales si premtim elektoral.
“Ndaloni përdorimin e premtimeve elektorale për të na zënë në befasi. Këto janë çështje shumë të mëdha. Vendimi se ku do të zhvillohet finalja është një çështje madhore”, ka shtuar kryeministri maroken.
Federata Mbretërore Marokene e Futbollit nuk ka dhënë ende një koment lidhur me deklaratat e presidentit të saj.
Ndërkohë, Maroku po ndërton një stadium të ri me kapacitet prej rreth 115 mijë ulësesh, i cili është paraparë për Botërorin 2030. Deri në maj, punimet në stadium ishin rreth tridhjetë për qind të përfunduara, ndërsa zyrtarët shpresojnë që ndërtimi të përfundojë deri në fund të vitit 2027.
FIFA kishte zgjedhur stadiumin në New Jersey të Shteteve të Bashkuara për finalen e Botërorit 2026, ndërsa vendimi ishte bërë publik vetëm në shkurt të vitit 2024.
Për këtë arsye, vendimi për finalen e Botërorit 2030 mund të mos merret së shpejti, pavarësisht deklaratave nga pala marokene.
