Boksieri shqiptar, Kristian Prenga do të zbresë në ring më 25 korrik të këtij viti, për t’u përballur jo me një kundërshtar dosido, por të madhin Anthony Joshua. Pavarësisht rivalit që ka përballë, Prenga duket mjaft i motivuar.
“Çdo herë që ngjitem në ring, mbaj me vete Shqipërinë. Kjo është më shumë se një ndeshje, është krenari, qëllim dhe përgjegjësi. Luftoj për gjithçka që përfaqësoj. Ky është vetëm fillimi”, shkruan Prenga në rrjetet sociale.
Vlen të theksohet se për Prengën ky duel është vazhdimësi, ndërsa për Joshuan rikthim. Vetëm pak muaj më parë, ky i fundit u përfshi në një aksident tragjik, ku humbën jetën dy miqtë e tij, por vetë shpëtoi mrekullisht.
Përsa i përket statistikave të boksierit shqiptar, 35-vjeçari ka shifra mjaft pozitive. Gjatë karrierës së tij, Kristian Prenga ka fituar 20 duele, teksa ka humbur vetëm 1, atë kundër Giovanni Auriemma.
