Kombëtarja e Kosovës në futboll, të hënën ka vazhduar me stërvitjen e radhës për dy ndeshjet miqësore të këtij muaji, me Armeninë dhe Komoret.
Edhe stërvitjen e dytë, Kosova e ka zhvilluar në Kampin Nacional të FFK-së, në Hajvali kurse munguan mbrojtësi Ismajl Beka dhe portieri Amir Shaipi.
Beka është lënduar në stërvitjen e parë, të mbajtur të dielën dhe ka punuar individualisht me rekomandim të stafit mjekësor kurse Shaipi nuk ka stërvitur fare për shkaqe shëndetësore.
Përkundër kësaj, selektori Franco Foda dhe stafi i tij, kanë punuar me pjesën tjetër të ekipit në filozofinë e lojës që synohet në këto dy miqësore.
Kosova të dyja miqësoret, si me Armeninë që e luan me 6 qershor dhe atë me Komoret që është më 9 qershor, i zhvillon në stadiumin “Fadil Vokrri” në Prishtinë.
Prurjet e reja te Kosova, Bledian Krasniqi e Florian Haxha kanë folur pas stërvitjes, ku janë shprehur tejet të lumtur për ftesën e parë dhe të motivuar për duelet e këtij muaji.
“Në ekip më kanë pritur shumë mirë dhe jam krenar që jam i përzgjedhur për të përfaqësuar Kosovën. Stërvitja ka qenë shumë e mirë dhe besoj se në këto dy ndeshje do të paraqitemi mirë dhe do të kemi rezultate pozitive”, tha Krasniqi.
Ndërkohë, Haxha ka shtuar se për Kosovën është shumë e rëndësishme që ta mposht Armeninë dhe Komotret, ndeshje që i sheh si përgatitore për ciklin kualifikues të Botërorit 2026.
“Fillimisht, jam shumë i lumtur për ftesën nga Kombëtarja e Kosovës. Tashmë kemi përfunduar stërvitjen e dytë, e cila ishte shumë intensive dhe besoj se nga nesër do të fillojmë përgatitjet për ndeshjen kundër Armenisë”, shtoi Haxha.
Të dyja këto miqësore fillojnë në orën 19:00 dhe do ti shërbejnë Kosovës të bëhet gati për përballjet e para kualifikuese, të cilat i luan në muajin shtator.
“Dardanët” janë pjesë e Grupit B kualifikues, të cilin e përbëjnë edhe Zvicra, Suedia e Sllovenia.
