Futbollistet e Kombëtares së Kosovës U19 e kanë fituar me rezultat të lartë edhe ndeshjen e dytë në kuadër të raundit të dytë të kualifikimeve për Euro 2024.
Të premten në Gjibraltar, futbollistet e reja të Kosovës fituan 4:0 ndaj Luksemburgut. Pjesa e parë, përfundoi me avantazhin 1:0 të Kosovës, falë golit të Rreze Gashit në minutën e 40-të.
Me të nisur pjesa e dytë, në minutën e 49-të, Sahare Berisha shënoi për 2:0. Dominimi i Kosovës u vulos me golin e tretë, që e shënoi Alba Shabani në minutën e 54-të, përpara se lojtarja e Luksemburgut të shënoj autogol në minutën e 82-të për rezultatin final, 4:0.
Tri ditë më parë, Kosova U19 fitoi 5:0 ndaj Gjibraltarit. Më 8 prill, Kosova U19 e ka ndeshjen vendimtare për vendin e parë në grupin e tretë, ndaj Izraelit.
Kosova garon në Ligën B, prej të cilës kualifikimi në Evropian nuk është i mundur. Nëse e fiton grupin, Kosova U19 promovohet në Ligën A për ciklin e ardhshëm kualifikues.
