Në Shkup u lansua nisma e katër shteteve të Ballkanit Perëndimor të cilat kanë rreshtuar 100% politikën e Jashtme dhe të Sigurisë me atë BE-së – QUAD.
Kosova iu bashkua kësaj nisme së bashku me Shqipërinë, Maqedoninë e Veriut dhe Malin e Zi.
“Ky kuadrat i shteteve vijon të përafrojë në vazhdimësi dhe të përditësojë çdo politikë të Jashtme e të Sigurisë së BE-së dhe ShBA-ve, veçanërisht në vendosjen e sanksioneve ndaj Rusisë, si rrjedhojë e agresionit të paprovokuar të Rusisë në Ukrainë”, thuhet në njoftimin e Ministrisë së Punëve të Jashtme dhe Diasporës.
Në njoftin thuhet se shtetet me qëndrim të tillë do të vijojnë komunikimin dhe bashkëpunimin në funksion të mirëmbajtjes së kësaj trajektoreje përafruese me botën perëndimore.
Pjesë e kësaj nisme nga Kosova ishte zv/ministri i MPJD-së, Kreshnik Ahmeti.
