Tri skuadra tashmë e kanë siguruar kalimin në gjysmëfinale të Kupës së Kosovës në futboll, ndërsa emri i ekipit të fundit do të mësohet pas përballjes mes Llapit dhe Malishevës.
Në çerekfinale, Ballkani siguroi kualifikimin pas fitores 2-1 ndaj Gjilanit në stadiumin e qytetit në Suharekë.
Bleart Tolaj kaloi vendasit në epërsi në minutën e 13-të, ndërsa Geralb Smajli dyfishoi rezultatin në minutën e 40-të. Golin e vetëm për mysafirët e realizoi Senad Jaroviq në minutën e 71-të.
Fitore në shtëpi shënoi edhe Ferizaji, që mposhti skuadrën e Vushtrrisë me rezultat 2-0. Epërsia erdhi pas një autogoli të portierit mysafir Marly Prince Heritier Koubassanath, ndërsa rezultatin përfundimtar e vulosi Erion Sadriu nga penalltia në minutën e 75-të, kurse Dukagjini arriti fitore bindëse 3-0 ndaj Feronikelit.
Ndërkohë, sot pritet të zhvillohet çerekfinalja e fundit mes KF Llapi dhe FC Malisheva në stadiumin “Zahir Pajaziti”, në Podujevë, ku do të përcaktohet edhe gjysmëfinalisti i fundit i Kupës së Kosovës.
