Sipas MSH-së, pacienti është i moshës 69-vjeçare dhe gjendja e tij është stabile.
Nga kjo ministri kanë bërë të ditur se pacientit i është marrë mostra nga ndryshimi lëkuror dhe do të dërgohet në laboratorin e referent të OBSH-së në Holandë.
“Ministria e Shëndetësisë, përkatësisht, Instituti Kombëtar Shëndetësisë Publike të Kosovës, me datë 03 qershor 2022 në ora 17:41, nga Klinika Infektive, QKUK, ka pranuar një raportim për një rast të dyshimtë në Lijën e majmunëve (Monkeypox). Pacienti është mashkull, i lindur më 1953 nga komuna e Dragashit. Është i hospitalizuar në Klinikën Infektive, QKUK me datën 03/06/2022 dhe i është marrë mostër nga ndryshimi lëkuror dhe do të dërgohet për analiza laboratorike. Gjendja e pacientit është stabile. Po vazhdon mbikëqyrja epidemiologjike e pacientit dhe gjurmimi i kontakteve”, thuhet në njoftim.
Po ashtu nga MSH-ja kanë thënë se pacienti është në izolim, i hospitalizuar në Klinikën Infektive në QKUK.
“Mostra do të dërgohet në laboratorin referent të OBSh në Hollandë, presim edhe rezultatet laboratorike deri në diagnozën përfundimtare sipas kritereve të parapara. Pacienti është në izolim, i hospitalizuar në Klinikën Infektive, QKUK”, thuhet më tej në njoftimin e kësaj ministrie. /teve1.info/
