Ministri në detyrë i Punëve të Jashtme të Kosovës, Glauk Konjufca, deklaroi se marrëdhëniet ndërmjet Kosovës dhe Shqipërisë karakterizohen nga bashkëpunim i ngushtë institucional dhe koordinim i vazhdueshëm në politikën e jashtme.
Pas takimit zyrtar me homologun e tij shqiptar, Ferit Hoxha, Konjufca tha se kontaktet mes dy vendeve janë të rregullta dhe të përhershme, duke theksuar se Kosova dhe Shqipëria ndajnë objektiva të përbashkëta shtetërore dhe kombëtare.
Sipas tij, koordinimi i politikës së jashtme ndërmjet dy shteteve është i natyrshëm, pasi të dyja përfaqësojnë interesat e të njëjtit komb dhe ndajnë të njëjtin orientim strategjik drejt integrimit euroatlantik dhe vlerave perëndimore.
Konjufca vlerësoi gjithashtu progresin e Shqipërisë në rrugën drejt anëtarësimit në Bashkimin Evropian, duke përgëzuar autoritetet shqiptare për reformat dhe arritjet e deritanishme.
Ai tha se, bazuar në vlerësimet e zyrtarëve evropianë me të cilët ka zhvilluar takime, Shqipëria konsiderohet ndër vendet më pranë anëtarësimit në BE dhe mund të bëhet pjesë e bllokut evropian brenda dy ose tre viteve të ardhshme.
“Ky do të ishte një sukses historik jo vetëm për Shqipërinë, por për mbarë kombin shqiptar”, u shpreh Konjufca, duke e krahasuar këtë arritje me anëtarësimin e Shqipërisë në NATO, të cilin e cilësoi si një hap të rëndësishëm strategjik për shqiptarët.
