Kombëtarja e Kosovës në futboll do të paraqitet me fanella të reja tash e tutje. Bëhet fjalë për fanellat e brendit të njohur të veshmbathjeve sportive “Adidas”, ka njoftuar FFK-ja të premten.
Bashkëpunimi me “Adidas” është mundësuar nga Skema e Asistencës për Veshje e UEFA-s.
“Përmes kësaj skeme, Federata e Futbollit e Kosovës përfiton nga furnizimi me veshje cilësore për ndeshje dhe stërvitje, të dizajnuara në mënyrë të personalizuar dhe në përputhje me identitetin e ekipit”, ka njoftuar Federata e Futbollit e Kosovës.
Kjo skemë është themeluar në vitin 2007 dhe ka synim mbështetjen e federatave nacionale.
“Për dy sezonet e ardhshme, dhjetë kombëtare evropiane, përfshirë Kosovën, do të paraqiten me dizajne unike të ‘adidas’, të zhvilluara në bashkëpunim të ngushtë me federatat përkatëse”.
