Kompania Kosovare për Distribuimin e Energjisë Elektrike (KEDS) është gjobitur me 25 mijë euro nga Ministria e Industrisë, Ndërmarrësisë, Tregtisë dhe Inovacionit (MINTI), pasi gjatë inspektimeve janë identifikuar pesë njehsorë elektrikë me afat të skaduar të verifikimit metrologjik.
Sipas njoftimit të MINTI-t, kontrollet janë realizuar nga Agjencia e Metrologjisë së Kosovës (AMK) dhe Inspektorati Qendror i Mbikëqyrjes së Tregut, në kuadër të aktiviteteve të vazhdueshme për mbikëqyrjen dhe verifikimin e njehsorëve elektrikë në territorin e Kosovës.
MINTI dhe AMK kanë bërë të ditur se inspektimet do të vazhdojnë edhe në ditët në vijim me qëllim të garantimit të matjes së saktë të konsumit të energjisë elektrike, mbrojtjes së të drejtave të konsumatorëve dhe respektimit të standardeve ligjore në fuqi.
Institucionet përgjegjëse kanë theksuar se mbeten të përkushtuara për të siguruar që çdo njehsor elektrik në përdorim të jetë i verifikuar dhe në përputhje me kërkesat ligjore, duke rritur transparencën dhe besueshmërinë në procesin e matjes së energjisë elektrike.
Po ashtu, MINTI u ka bërë thirrje qytetarëve që të raportojnë çdo dyshim apo parregullsi lidhur me funksionimin e njehsorëve elektrikë.
“Qytetarët të vazhdojnë t’i adresojnë ankesat dhe informacionet e tyre përmes numrit +383 (0) 46 311 000 në Viber, si dhe përmes adresës elektronike [email protected]”, theksohet në fund të njoftimit.
