Klubi i basketbollit Bashkimi do të marr pjesë në garën evropiane FIBA Europe Cup, me ndeshjet kualifikuese që do të zhvillohen në muajt shtator dhe tetor.
Pas Trepçës që do të luajë në Ligën e kampionëve, nënkampioni i Kosovës në basketboll, do të paraqitet në garën e tretë evropiane për nga rëndësia.
Bashkimi është pjesë e 29 ekipeve që janë regjistruar për këtë garë, ndërsa do të zhvillojë dy ndeshje kualifikuese për t’u futur në fazën e grupeve.
Ekipi prizrenas bën pjesë në grupin e ekipeve jo bartëse, ndërsa mund të përballet me ndonjërën nga tetë ekipet bartëse, si Kangoeroes Basket Mechelen (Bel), BC Balkan (Bul), Anorthosis Famagusta (Qip), Transcom Parnu (Est), Peristeri BC (Gre), Anwil Wloclawek (Pol), Prievidza (Svk) dhe BC Dnipro (Ukr).
Shorti për ndeshjet kualifikuese hedhet më 23 korrik në Munchen, derisa ndeshjet kualifikuese zhvillohen më 24 shtator dhe 1 tetor.
