Avokati, Emrush Kastrati ka vlerësuar se kërkesa e Zyrës së Prokurorit të Specializuar që Hashim Thaçi, Kadri Veseli, Jakup Krasniqi dhe Rexhep Selimi të dënohen me nga 45 vjet burgim, apo 180 vjet në total, është një dënim që nuk ekziston në asnjë legjislacion.
Në emisionin “Ditari” në Tëvë1, Kastrati ka theksuar se një dënim i tillë nuk parashihet as në legjislacionin paraprak, përfshirë edhe atë të kohës së Jugosllavisë, kur pretendohet se janë kryer krimet, e as në legjislacionet vijuese.
“Është një dënim i cili nuk parashihet në asnjë legjislacion paraprak, përfshirë edhe atë të kohës së Jugosllavisë, kur pretendohet se janë kryer krimet, e as në legjislacionet vijuese. Pavarësisht se Ligji për Dhomat e Specializuara parasheh mundësinë e shqiptimit të dënimit me burgim të përjetshëm për krime kundër njerëzimit gjatë kohës së luftës, kjo duhet të bëhet duke zbatuar ligjin më të favorshëm. Kodi Penal i ish-RSV-së parashihte dënim me burgim deri në 15 vjet, përkatësisht dënim me vdekje, i cili më pas zëvendësohej me burgim deri në 20 vjet. Një dënim prej 45 vjetësh nuk ka bazë ligjore”, ka deklaruar Kastrati.
Ai ka shprehur bindjen se rrjedha e procesit gjyqësor ndaj ish-krerëve të UÇK-së ka marrë drejtim pozitiv, veçanërisht pas dëshmive të dëshmitarëve të mbrojtjes, Rubin dhe Clark.
“Sipas këtyre dëshmive, është vërtetuar fuqishëm se roli efektiv i ish-krerëve të UÇK-së, ashtu siç është paraqitur nga organi i akuzës në Dhomat e Specializuara, nuk përputhet me realitetin”, ka shtuar ai.
I pyetur për epilogun e procesit gjyqësor, Kastrati ka theksuar se pret një aktgjykim lirues.
“Bazuar në zhvillimet e deritanishme dhe veçanërisht në dëshmitë e mbrojtjes, kam arritur në përfundimin se në këtë rast duhet të ketë vetëm aktgjykim lirues, pasi nuk është provuar asnjë nga tezat e aktakuzës së Prokurorisë”, ka përfunduar Kastrati.
Ndryshe, Prokurorja e specializuar Kimberly West njoftoi të hënën se Zyra e Prokurorit të Specializuar kërkon që Hashim Thaçi, Kadri Veseli, Jakup Krasniqi dhe Rexhep Selimi të dënohen me nga 45 vjet burgim apo 180 vjet në total./teve1.info/
