Në raportet e përditshme të saj, policia zakonisht njofton për sekuestrim të lëndëve narkotike në sasi të vogël.
Megjithatë, vetëm të hënën në dy operacione, shteti shkatërroi dy laboratorë për prodhimin e saj.
Në veri u zbulua laboratori me mbi 10 mijë fije bimë marihuanë, kurse në Ferizaj mbi 70 kg drogë kaptagon.
Policia ka thënë për televizionin se në 5 muajt e fundit ka zhvilluar 107 operacione dhe 204 bastisje, me ç’rast ka konfiskuar 279 kg marihuanë, 192 kg heroinë dhe 13 mijë e 492 bimë kanabis sativa.
Për profesorin e çështjeve të sigurisë, Sheqir Kutllovcin, institucionet e sigurisë duhet të shtojnë kujdesin në zonat malore më pak të banuara, e për këtë thotë se nevojitet edhe ndihma e qytetarëve.
“Ne e dimë në zonat e larta të vendeve tona, kemi vende që nuk i viziton askush. Kemi prodhime që nëse i marrim zonat e larta banorët janë largu prej aty dhe ata të cilët manipulojnë në këtë drejtim dmth punojnë merren me to, edhe puna e tyre, prodhimi i tyre nëse e shikon prej një lartësie nuk ta jep se janë duke prodhuar drogë”, thotë Kutllovci.
E për një tjetër njohës të çështjeve të sigurisë institucionet kosovare duhet të bashkëpunojnë me shtetet prej nga vijnë drogat dhe me vendet ku ka informacione se mund të bëhet eksporti.
“Neve jemi të vetëdijshëm që kemi një mërgatë goxha serioze në Evropë me ç’rast eventualisht mund të përdoren kanale të ndryshme dhe grupe bashkëpunimi për të eksportuar prodhime tona të lëndëve narkotike në vende tjera dhe në kontekst të sigurisë mund të kemi impakte serioze sa i përket marrëdhënieve me shtete të tjera”, thotë Bedri Elezi, njohës i çështjeve të sigurisë.
Vlera e lëndëve narkotike të konfiskuara vetëm të hënën e 23 majit kalon shumën e 7 milionë eurove.
Kronika e realizuar nga gazetari Gojart Jashari.
