Mesfushori i talentuar, Dijon Kameri, është larguar nga gjiganti austriak, Red Bull Salzburg dhe karrierën do ta vazhdojë në Poloni te Cracovia.
21-vjeçari gjithë zhvillimin e ka bërë te Salzburgu, ndërsa ka pasur periudha huazimi te Grasshopperi në Zvicër dhe Altachu në Austri.
Megjithatë, pasi nuk ia doli të stabilizohet në ekipin bazë të Salzburgut, Kameri vendosi për transferim në Poloni.
Me Cracovian ka firmosur për tri vjet, me mundësi të vazhdimit edhe për një vit tjetër.
“Kam dëgjuar shumë për atmosferën në stadiumin Kaluza dhe mezi pres ta përjetoj atë nga afër”, ka thënë Kameri për sajtin zyrtar të klubit polak.
Ai ka luajtur për grupmoshat e reja të Austrisë dhe vlerësohej prej talenteve më të mëdha në këtë vend.
