Jo vetëm Xabi Alonso për pankinën e Realit të Madridit. Drejtuesit e “Los Blancos” kanë edhe një tjetër preferencë në lidhje me pasardhësin e Carlo Ancelottit.
Italiani do të marrë drejtimin e kombëtares së Brazilit në fundin e sezonit, ndërkohë që Florentino Perez ka një vlerësim të madh për Roberto De Zerbin.
44-vjeçari italian po dhuron spektakël me Brightonin në Premier League, teksa njësoj ka bërë edhe me Sassuolon në Serie A.
De Zerbi krahasohet me Pep Guardiolën për stilin e tij të futbollit. Tekniku nga Brescia frymëzohet nga spanjolli i Manchester City, teksa ka kontratë me Brightonin deri në 2026.
Por në akordin me drejtuesit është rënë dakord që të lejohet largimi i tij i parakohshëm nëse vjen ndonjë telefonatë e parefuzueshme. Si ajo e Realit.
Xabi Alonso, i cili gjithashtu po bën shumë mirë në Bundesliga me Bayer Leverkusen, mbetet favoriti kryesor për të zëvendësuar Ancelottin.
Ish-mesfushori e njeh mirë ambientin te Reali, pasi ka luajtur si futbollist në “Santiago Bernabeu”, por presidentin Perez e intrigon shumë edhe opsioni De Zerbi.
Skuadra e të cilit po zhvillon një futboll shumë të bukur dhe renditet në vendin e tretë në Premier League me sulmin më të mirë në kampionatin anglez për momentin.
