Sot janë bërë 57 vjet nga dita kur në Kuvendin e atëhershëm të Kosovës u miratua ligji për themelimin e Universitetit të Prishtinës.
Më 18 nëntor 1969, Kuvendi i Kosovës miratoi ligjin me të cilin iu dha dritë e gjelbër themelimit të Universitetit të Prishtinës. Pas këtij akti themeltar, Universiteti nisi punën më 15 shkurt të vitit vijues, 1970.
Themelimi i universitetit ishte një nga kërkesat kryesore të demonstratave të vitit 1968, ndërsa institucioni më i rëndësishëm i arsimit të lartë dhe kërkimit shkencor jo vetëm në Kosovë pati fatin e njëjtë me popullin të cilit i takonte.
“Të rralla janë universitetet që mund të kenë pasur një ndikim aq të madh në zhvillimin e shoqërisë dhe të gjitha etapat e luftës për liri, demokraci, pavarësi e shtetndërtim të një vendi, aq sa kishte dhe ka Universiteti i Prishtinës për Kosovën. Gjithçka që është krijuar në Kosovë në 60 vjetët e fundit është e lidhur me UP-në. Duke qenë edhe universitet i historisë dhe trashëgimisë, UP-ja është përcaktuar fuqishëm për të hapëruar me kohën dhe zhvillimet aktuale globale, duke u hapur në vazhdimësi për sfidat dhe mundësitë e kohës në të cilën jetojmë”, thuhet në komunikatën e UP-së.
Në komunikatë thuhet se në Universitetin e Prishtinës sot zhvillohet dije e kërkim shkencor i nivelit botëror, ndërkaq studentët dhe profesorët e tij me rezultatet, punën dhe sukseset e tyre e dëshmojnë përditë se nuk dallojnë për nga përgatitja profesionale nga kolegët e tyre të universiteteve më prestigjioze të globit.







