Instituti Kombëtar i Shëndetësisë Publike të Kosovës ka njoftuar se gjatë periudhës 16–30 prill 2026 në vend janë konfirmuar tetë raste të fruthit, ndërsa dy raste të tjera mbeten të dyshimta.
Sipas njoftimit, të gjitha rastet e konfirmuara janë fëmijë të pavaksinuar me vaksinën MMR vaccine (kundër fruthit, shytave dhe rubellës), të cilët po trajtohen në spital.
Duke pasur parasysh përhapjen e lehtë të Fruthi, IKSHPK u ka bërë thirrje urgjente prindërve që të verifikojnë statusin e vaksinimit të fëmijëve dhe të kryejnë vaksinimin në qendrat më të afërta të mjekësisë familjare.
Instituti gjithashtu ka rekomanduar shmangien e kontakteve të panevojshme me persona që shfaqin simptoma si temperaturë e lartë, skuqje në lëkurë, kollë dhe rrufë.
“Çdo person me shenja të dyshimta duhet të paraqitet menjëherë në institucionet shëndetësore”, thuhet në njoftim.
Sipas IKSHPK-së, po zhvillohet mbikëqyrje aktive e situatës epidemiologjike, ndërsa në terren janë ndërmarrë masa konkrete, përfshirë identifikimin e fëmijëve të pavaksinuar, kontaktimin e prindërve dhe angazhimin e ekipeve mobile për vaksinim derë më derë në zonat me mbulueshmëri më të ulët.
IKSHPK ka rikujtuar se vaksinimi mbetet mënyra më efektive për parandalimin e përhapjes së fruthit dhe mbrojtjen e shëndetit publik, duke theksuar se çdo vonesë në vaksinim e rrit rrezikun për përhapje të mëtejshme dhe komplikime serioze, veçanërisht tek fëmijët dhe personat me imunitet të dobësuar.
“Mbrojtja e shëndetit publik është përgjegjësi e përbashkët, prandaj IKSHPK bën thirrje për bashkëpunim dhe përgjegjësi qytetare me qëllim të mbrojtjes së shëndetit të fëmijëve”, thuhet në fund të njoftimit./teve1.info/
