Kombëtarja e Shqipërisë, ditën e sotme ka mbajtur konferencë për media, para ndeshjes me Serbinë.
Te kampi kuq e zi, të pranishëm ishin futbollistët Elseid Hysaj dhe Qazim Laçi.
Elseid Hysaj ka folur pas rikthimit te Kombëtarja shqiptare. Mbrojtësi me përvojë deklaroi në konferencë për shtyp se Serbia është kundërshtari i tyre direkt për vendin e dytë, si dhe foli për presionin e këtij ballafaqimi.
“Kjo është ndeshje e rëndësishme sepse janë ndër kundërshtarët më direkt me ekipin tonë. Marrëdhëniet në vendet tona nuk duhet të hyjmë ne futbollistët, ka kush merret me këtë punë. Ne duhet të luajmë ndeshjen tonë, të jemi të përqendruar, të qetë, e dimë që është kundërshtar direkt, dhe mos mendojmë për probleme anasjellas siç mund të kenë.
“Është një presion i madh, por ky presion do të jetë shumë i vlefshëm për të zbritur në fushë fort dhe me kurajo. Është ndeshje e veçantë, por futbolli duhet hyrë në fushë me qetësi dhe të bëjmë më të mirën për të marrë një fitore 3 pikë.”
Edhe mesfushori shqiptar Qazim Laçi u shfaq optimist dhe me fokusin vetëm te fitorja.
“Kemi një ndeshje shumë të fortë, luajmë brenda në shtëpi, nuk është njëra apo tjetra skuadër e favorizuar, të barabartë dhe do të duket brenda në fushë. Ne do përgatitemi nga ana jonë për fitoren, ajo ka rëndësi për momentin. Do mundohemi ta marrim ndeshjen si profesionistë dhe mos emocionohemi aq shumë si njerëzit jashtë. Është gjë e mirë kjo se dhe ne në fushë mund të japim më shumë.”
Shqipëria do të përballet me Serbinë të shtunën, nga ora 20:45, teksa në grupin K të kualifikimeve për Botëror bëjnë pjesë edhe Anglia, Letonia dhe Andorra.
