Deputetja e Partisë Demokratike të Kosovës, Eliza Hoxha ka deklaruar se kryeparlamentari në detyrë, Glauk Konjufca ka treguar që është i aftë të tejkaloj bindjet partiake për të krijuar klimë komunikimi brenda Kuvendit.
Hoxha në emisionin “Info Nata” në Tëvë1 është shprehur se kjo nuk e bën Konjufcën njeri më të dashur për PDK-në por sipas saj një njeri i tillë thjesht i bën nder Kuvendit.
“Konjufca thjesht e ka treguar që mund të kapërcej bindjet e tij partiake për të krijuar klimë komunikimi brenda Kuvendit të Kosovës edhe në momentet më të vështira që i kemi pasur aty dhe kjo nuk e bën as më të dashur për ne e as më të padashur sepse s’kemi nevojë për ato lloj relacionesh thjesht e bën ndoshta person që është sprovuar dhe ka komunikuar dhe mund të jetë çdo emër i cili Kuvendit do t’i bënte nder në kuptimin e krijimi të një klime komunikimi dhe bashëkpunimi”, ka thënë Hoxha.
E pyetur nëse Konjufca do të ishte emër i pranueshëm për PDK-në për kryetar të Kuvendit, Hoxha ka thënë se nuk e kanë diskutuar asnjë emër në parti.
Ndërkaq, afërsia e tij me PDK-në për Hoxhën nënkupton vetëm sjelljen minimale dhe mirësjelljen elementare në një institucion publik.
“Nuk ka të bëj me afërsi se edhe kjo puna e përshëndetjeve shumë interesante dhe e mirë për me u diskutu. Për me u shqetësu është mospërshëndetja e Kurtit jo për ne por për të sepse ta përshëndesësh dikë në institucion ose në jetën publike nënkupton sjelljen minimale apo mirësjelljen elementare. Ne s’kemi nevojë të kemi dashuri apo simpati me njëri tjetrin thjesht në institucion ne duhet të komunikojmë në kuptim racional, mund të kemi beteja ose mendime të ndryshme për proceset e njëjta por të gjitha betejat duhet të balancohen dhe të peshohen dhe në momentin që marrin shumicën duhet t’i respektojmë”, ka shtuar ajo./teve1.info/
