Ai është shprehur i zhgënjyer me raportimet siç i quan ai të pasakta në lidhje me vendndodhjen e takimit Kurti-Sullivan.
“U befasova kur pashë disa shkrime të pasakta dhe mashtruese në shtypin lokal në lidhje me vendndodhjen e Kryeministrit Albin Kurti gjatë takimit me këshilltarin e Sigurisë Kombëtare, Jake Sullivan”, tha Hovenier.
(1/3) I was surprised to see several inaccurate & misleading stories in local press regarding the location of Prime Minister @albinkurti’s cabinet-level meeting with @POTUS Biden’s National Security Advisor @JakeSullivan46. pic.twitter.com/wcL75xf54d
— Ambassador Jeff Hovenier (@USAmbKosovo) May 31, 2022
Hovenier përmes një postimi në Twitter, ka thënë se takimi i Kurtit me këshilltarin e Sigurisë Kombëtare të presidentit Joe Biden, Jake Sullivan ishte mbajtur në Shtëpinë e Bardhë.
“Ndërtesa e Zyrës Ekzekutive Eisenhower është pjesë e Shtëpisë së Bardhë. Takimet komplekse dhe të nivelit të lartë, duke përfshirë Presidentin, Zëvendës Presidentin dhe Këshilltarin e Sigurisë Kombëtare mbahen rregullisht atje”, ka shkruar ai.
Ambasadori amerikan përmend edhe takimet e nivelit të lartë që ishin mbajtur edhe në të kaluarën, si ai i Hashim Thaçi dhe Joe Bidenit.
“Një shembull, në vitin 2010, unë isha i pranishëm në një takim mes zëvendës presidentit të atëhershëm Biden dhe kryeministrit të atëhershëm Hashim Thaçi në ndërtesën e Zyrës Ekzekutive Eisenhower”, ka thënë më tej Hovenier.
Ndryshe, kryeministri i Kosovës, Albin Kurti ishte në një vizitë disa ditore në Shtetet e Bashkuara të Amerikës, ku atje ka takuar seantorë, kongresmen dhe përfaqësues të bizneseve.
Për këto takime, Kurti është kritikuar nga opozita që sipas tyre kryeministri nuk ka zhvilluar takime me përfaqësues të nivelit të lartë në SHBA.
Ndërsa, Kurti ditë më parë para mediave ka thënë se ka qenë në Shtëpinë e Bardhë, duke përmendur takimin me këshilltarin e Sigurisë Kombëtare, Jake Sullivan./teve1.info/
