Leon Avdullahu e ka bërë një hap të madh në karrierë, kur të enjten kaloi nga kampioni dhe fituesi i Kupës së Zvicrës, Baseli, te skuadra elitare e Gjermanisë, Hoffenheim.
Me skuadrën e Bundesligës mesfushori 21-vjeçar ka nënshkruar kontratë afatgjate derisa Baseli ka përfituar financiarisht nga shitja e Avdullahut.
Mediumet në Zvicër kanë raportuar se Baseli i ka fituar rreth 9 milionë euro nga shitja e Avdullahut.
Pjesë e ekipit të parë të Hoffenheimit janë edhe dy futbollistët tjerë shqiptarë, Zidan Tairi dhe Fisnik Asllani, ky i fundit rikhthehet në klub pas një sezoni në ligën e dytë.
“Në moshën vetëm 21-vjeçare, Leoni e ka vendosur veten e tij si titullar dhe lojtar kyç në mesfushën e Baselit. Ai është një lojtar me mendësi strategjike, që e kombinon agresivitetin dhe aftësinë për të ndërhyrë me inteligjencë. Ka edhe aftësi të forta teknike”, ka thënë drejtori sportiv i Hoffenheimit, Andreas Schicke. “E dimë që Leoni kishte mundësi të ndryshme këtë verë. Jemi edhe më të kënaqur që ai ka vendosur me vetëdije ta bëjë hapin tjetër në karrierën e tij me ne dhe dëshiron ta ndjekë rrugën tonë”.
Avdullahu është zhvilluar si futbollist te Baseli, që nga viti 2018 pasi iu bashkua nga Solothurni. Në vitin 2023 u bë lojtar i ekipit të parë të Baselit. Në edicionin e fundit, të cilin Baseli e mbylli me dy trofe të fituar, Avdullahu luajti 35 ndeshje.
Futbollisti, 185 centimetra i gjatë, në total ka luajtur 71 ndeshje për Baselin. Ka shënuar tre gola. Ai, po ashtu, ka udhëhequr ekipin U21 të Zvicrës si kapiten. Është potencial për t’u ftuar në të ardhmen edhe te Zvicra.
