Përmes një postimi në Facebook, Haxhiu ka thënë se atë kohë Kosova po përjetonte një gjenocid të tmerrshëm të Serbisë ndaj popullsisë shqiptare.
“23 vjet më parë, Kosova po përjetonte një gjenocid të tmerrshëm të vrasjeve masive të popullsisë civile. Një pranverë e cila po karakterizohej me operacione shoviniste të Serbisë ndaj popullsisë shqiptare. Në Pastaselë të Rahovecit më 31 mars 1999 u ekzekutuan dhe masakruan 106 shqiptarë nga ky fshat dhe fshatrat e tjera që kishin ardhur për strehim. Në Burim të Malishevës, më 31 mars 1999 janë vrarë 42 shqiptarë, kufomat e të cilëve janë masakruar. Viktimat ishin nga mosha 16 – 72 vjeç. Nëse botërisht ishte e qartë se kush ishin kriminelët e luftës, në vitin 1998/1999, bota duhet të dijë sërish, se kriminelët ishin në anën e Serbisë. Shumë prej tyre vazhdojnë ende të mbesin të lirë”, ka shkruar Haxhiu.
Haxhiu ka shtuar se drejtësia ende mungon për viktimat, familjarët dhe për popullin e Kosovës, teksa ka shtuar se institucioneve të vendit iu mbetet të përkushtohen edhe më tej që kriminelët serb të dalin para drejtësisë. /Teve1.info/
