Kryetari i AAK-së, Ramush Haradinaj i cili ishte pjesë e ceremonive përkujtimore në përvjetorin e 26 të masakrave në Krushë të Madhe e Krushë të Vogël, tha se në fund të marsit 1999, të dyja këto vende u bënë dëshmitare të një prej akteve më të tmerrshme të shtetit serb.
“Ato ditë marsi, regjimi gjenocidal kreu një nga krimet më monstruoze dhe të planifikuara, duke ekzekutuar pa mëshirë 350 gra, pleq, fëmijë dhe të rinj të pafajshëm”, tha ai.
Haradinajt, tha se në këtë përvjetor, ndanë dhimbjen me familjarët që humbën më të dashurit e tyre, një dhimbje që tha se nuk shteret me kohën, por mbetet e gjallë në kujtesën kolektive.
“Kujtojmë sot me dhembje dhe nderim 49 martirët e familjes Berisha nga Suhareka, të cilët u ekzekutuan mizorisht nga forcat serbe. Nga fëmijët e vegjël deri te gjyshërit, një familje e tërë u përballë me një akt barbarie të papërshkrueshëm, një krim që tronditi ndërgjegjen njerëzore”, shkroi ai.
Të njëjtin terror, siç kujtoi ai, e përjetuan edhe 23 vëllezër e motra nga Landovica e Prizrenit dhe fshatrat përreth.
“Fëmijë e të moshuar u ekzekutuan pamëshirshëm, vetëm pse ishin shqiptarë, në tokën dhe në të drejtën e tyre. Masakrat anembanë Kosovës janë dëshmi e sakrificës së popullit tonë për liri. Ne nuk harrojmë dhe nuk do të ndalemi kurrë së kërkuari drejtësi për këto krime!”, shkroi kreu i AAK-së.
