Në një verë ku Milani kërkon të rindërtojë jo vetëm skuadrën, por edhe shpirtin e saj garues, emri që po përmendet shumë në zyrat e drejtuesve është ai i Granit Xhakës. Një mesfushor me karakter përvojë të madhe dhe efektiv në rolin e tij.
Pas emrit të Igli Tares si njeriu që do të drejtojë strategjinë sportive të skuadrës italiane, Milani ka zgjedhur të ndërtojë skuadrën duke filluar nga personalitetet, jo vetëm nga talenti.
Fillimisht u përmend Luka Modrić, por krahas tij është vendosur edhe emri i Xhakës.
Prej javësh, kontakti me Xhakën është vendosur. Lojtari është i hapur ndaj projektit, ndjen respekt për historinë e klubit dhe e sheh Milanin si një hap të natyrshëm në një karrierë që ka kaluar nga Premier League te Bundesliga, gjithmonë në nivelet më të larta.
Ajo që pengon sot transferimin është Leverkuseni, që nuk është i gatshëm ta lëshojë lehtë një prej motorëve të skuadrës. Kontrata e Xhakës zgjat deri në 2028, por paga e tij nuk duket të jetë një pengesë për Milanin.
