Nënkryetari i Aleancës për Ardhmërinë e Kosovës (AAK), Ardian Gjini, ka deklaruar pas takimit me ushtruesen e detyrës së presidentes, Albulena Haxhiu, se ekziston një dakordim pothuajse i plotë që zgjedhjet e parakohshme të mbahen më 7 qershor.
Gjini ka thënë se në takim është diskutuar caktimi i datës së zgjedhjeve dhe se, ndonëse AAK nuk ka pasur një preferencë të veçantë për datën, dy opsionet e propozuara kanë qenë të pranueshme për partinë.
“Ka një dakordancë pothuajse të plotë që data e zgjedhjeve të jetë 7 qershori. Edhe ne jemi pajtuar, edhe pse nuk kemi pasur ndonjë preferencë të posaçme; për ne të dy datat kanë qenë në rregull, mirëpo po duket se ka pothuajse konsensus për 7 qershorin,” u shpreh Gjini.
Ai ka theksuar se zgjedhjet përbëjnë një mundësi për vendin dhe se AAK është e përgatitur për garë të pavarur.
Sipas tij, qytetarët duhet ta shfrytëzojnë këtë proces zgjedhor si një mundësi për të orientuar vendin drejt stabilitetit politik dhe zhvillimit ekonomik.
“Zgjedhjet janë shans, pak kush i ka dashur tani, por zgjedhjet janë shans për vendin. Edhe ne po bëhemi gati që t’i japim Kosovës atë që duhet: një stabilitet dhe një rrugë zhvillimi. Mendoj se populli i Kosovës duhet ta shfrytëzojë këtë shans. Jemi të përgatitur të garojmë vetëm dhe t’i japim Kosovës atë që i duhet”, ka thënë ai./teve1.info/
